Барањето на МЕПСО се однесува на тарифата за пренос на електрична енергија, која би се зголемила од 0,3018 на 0,5966 денари за киловат-час од 1 јануари 2027 година, доколку РКЕ го одобри предлогот.
Ова не значи дека сметките за струја ќе се зголемат за 98 проценти. Станува збор за една компонента во формирањето на конечната цена на електричната енергија, а не за целата сметка што ја плаќаат домаќинствата. Реалниот ефект врз сметките ќе зависи од одлуката на РКЕ и од останатите компоненти на цената.
Неизвесност има и за корисниците на парно во Скопје. Четири компании поднеле барања за корекција на цената на топлинската енергија, посочувајќи го растот на цената на природниот гас како главна причина.
Според пресметките на ЕСМ, гасот во октомври е околу 60 проценти поскап во однос на параметрите врз кои е утврдена актуелната цена на парното. Сепак, тоа не значи дека и парното ќе поскапи за истиот процент.
Доколку РКЕ одобри ново зголемување, тоа ќе биде трето поскапување на парното во 2026 година. Во јануари цената беше зголемена за пет проценти, а од август следуваше ново зголемување од речиси шест проценти.
Засега нема потврдено колку би изнесувало евентуалното ново поскапување на парното, ниту конечна одлука за барањето на МЕПСО. РКЕ треба да ги разгледа доставените барања и да одлучи дали ќе ги прифати и во колкав обем.