Некогаш едно од најголемите индустриски имиња на Балканот, денес „Борово“ од Вуковар се соочува со предизвикот да го зачува своето постоење. Фабриката која во своите најславни денови вработуваше речиси 24.000 луѓе и произведуваше милиони пара обувки годишно, денес функционира со околу 500 вработени и бара нова шанса за развој.

Корените на „Борово“ се врзани за чешкиот претприемач Томаш Бата, кој во триесеттите години од минатиот век започнал производство во близина на Вуковар. Со текот на времето, фабриката прераснала во вистински индустриски град – со работнички населби, спортски терени, училишта, кино, библиотека и сопствени медиуми.

По Втората светска војна, „Борово“ станува еден од столбовите на југословенската индустрија. Освен обувки, компанијата произведувала гумено-технички производи и автомобилски гуми, а нејзините производи се извезувале на бројни пазари. Врвот го достигнува во осумдесеттите години, кога годишно произведувала околу 23 милиони пара обувки и вработувала речиси 24.000 луѓе.

Посебно место во историјата имаат моделите „Боросана“ и „Стартас“, кои за многумина претставуваат повеќе од обични обувки – тие се дел од спомените на неколку генерации. „Стартас“ стана препознатлив бренд и надвор од границите на поранешна Југославија, особено по Универзијадата во Загреб во 1987 година.

Сепак, уште кон крајот на осумдесеттите започнале првите сериозни проблеми. Намалената конкурентност, падот на продуктивноста и големиот број вработени го оптоварувале системот, а војната и губењето на традиционалните пазари дополнително го забрзале падот. Во меѓувреме, глобалната конкуренција целосно ги променила правилата на игра.

Денес „Борово“ е речиси во целосна државна сопственост и работи во тешки економски услови. Во јавноста се споменува интерес од потенцијални инвеститори, а хрватските институции веќе бараат стратешки партнер кој би помогнал во реструктуирањето и идниот развој на компанијата.

Иако „Борово“ и понатаму останува важен дел од идентитетот на Вуковар и симбол на едно индустриско време, неговата приказна е потсетник колку драстично може да се промени судбината на еден гигант. Од фабрика која беше град во град, денес се обидува да пронајде нов пат кон иднината.