Додека многу млади се обидуваат да најдат добро платена работа, некои веќе заработуваат суми што за повеќето луѓе изгледаат недостижни – и тоа преку содржините што секојдневно ги гледаме на Инстаграм, ТикТок и Јутјуб.
Еден од нив е Екнор Синг (22), кој годишно заработува повеќе од 120.000 фунти, односно приближно 140.000 евра, создавајќи кратки видеа за социјалните мрежи.
Неговата професија е позната како clipping, односно издвојување и монтажа на кратки, впечатливи делови од подолги видеосодржини.
Како заработува илјадници евра од видеа долги само 30 секунди?
Работата на Синг на прв поглед изгледа едноставно.
Неговите клиенти, меѓу кои може да има модни брендови, музички компании, филмски студија, инфлуенсери и автори на поткасти, му доставуваат подолги видеа.
Тој ги прегледува, ги избира најинтересните моменти и од нив создава кратки вертикални видеа во траење од 30 до 60 секунди, кои потоа се објавуваат на социјалните мрежи.
Целта е видеото да привлече што е можно повеќе внимание и да стане вирално.
„Колку повеќе прегледи ќе добие видеото, толку повеќе пари заработувам“, објаснува Синг.
Според моделите на плаќање што се користат во оваа индустрија, кратките видеа можат да донесат и до три долари, односно околу 2,70 евра, на секои 1.000 прегледи.
Тоа значи дека едно видео со милиони прегледи може да донесе значителна заработка, зависно од договорот со клиентот.
Сè започнало со видео од Дуа Липа
Синг открил дека оваа работа може да биде исплатлива минатата година, кога објавил кратко видео од поп-ѕвездата Дуа Липа на Инстаграм.
За таа објава заработил 300 долари, односно повеќе од 250 евра.
„Си помислив: Во ред, ова се многу пари само за објавување видео. Веднаш сфатив колку оваа работа може да биде исплатлива“, раскажал тој за Би-би-си.
Оттогаш, неговата заработка значително се зголемила.
Денес, како што вели, заработува најмалку 10.000 фунти месечно, односно приближно 11.700 евра.
Посебно внимание посветува на смешни, необични и динамични моменти што можат брзо да го привлечат вниманието на младата публика.
Како пример наведува снимка од реакцијата на пејачката Сабрина Карпентер кога некој ѝ згазнал на фустанот на Мет Гала во Њујорк.
Работа од дома, без шеф над глава и без фиксно работно време
Синг не е единствениот што заработува од ваков тип содржини.
Итан Вимс (24) од Вичита, Канзас, покрај својата главна работа како снимател, месечно заработува најмалку 1.000 долари од монтажа на кратки видеа.
Тој соработува со јутјуберот и автор на поткаст Калеб Хамер, познат по емисијата „Financial Audit“.
За Вимс, најголемата предност не е само дополнителната заработка, туку и слободата што ја нуди работата.
Благодарение на флексибилноста, може да поминува повеќе време со сопругата и едногодишниот син.
„Не сакам типична работа од девет до пет, каде што морам секој ден да одам во канцеларија“, вели тој.
Синг, пак, истакнува дека може да работи од речиси секоја локација.
„Можам да бидам каде било. Би можел да заминам на одмор и истовремено да заработувам пари“, објаснува тој.
Компаниите бараат млади луѓе што знаат што станува вирално
Популарноста на кратките видеа создаде и нов пазар на кој брендовите бараат луѓе што добро ги разбираат навиките на младата публика.
Една од платформите што ги поврзуваат компаниите со ваквите креатори е „Clipping Culture“.
Нејзиниот основач и директор, 21-годишниот Еван Стенфилд, го започнал бизнисот минатата година, откако ги напуштил студиите на Универзитетот во Канзас.
Според него, платформата денес поврзува брендови со повеќе од 340.000 креатори на кратки видеа ширум светот.
Меѓу клиентите се и познати имиња како „Capitol Records“, „Universal Music Group“ и „HBO Max“.
За компаниите, соработката со млади креатори што работат од дома може да биде поевтина од традиционалните рекламни кампањи, а во одредени случаи и поефикасна.
Основачот на американската компанија за модуларни куќи „Boxabl“, Галијано Тирамани, проценува дека кратките видеа досега ѝ донеле на компанијата околу една милијарда прегледи.
Освен преку „Clipping Culture“, креаторите можат да пронајдат клиенти и преку Редит, Дискорд и платформи како „Vyro“, „Whop“ и „Kick“.
Но, постои и друга страна на приказната
Иако заработката на Синг звучи примамливо, експертите предупредуваат дека ваквите приходи не се вообичаени за сите што се занимаваат со оваа работа.
Консултантката за социјални мрежи Лија Хаберман посочува дека само мал дел од креаторите успеваат да заработат значителни суми.
„Ова ја одразува економијата на креаторите на содржини воопшто. Огромното мнозинство заработува малку или воопшто не заработува“, предупредува таа.
Сличен став има и аналитичарот на стриминг-индустријата Девин Неш, кој нагласува дека успехот бара многу повеќе време и труд отколку што изгледа.
За да препознаат што може да стане вирално, успешните креатори мора постојано да следат трендови, да анализираат содржини и да поминуваат часови гледајќи видеа.
Дали ова е една од професиите на иднината?
Растот на ТикТок, Инстаграм Рилс и Јутјуб Шортс покажува дека кратките видеа стануваат важен дел од дигиталниот маркетинг.
За оние што имаат креативност, чувство за трендови и вештини за видеомонтажа, ова може да претставува интересна можност за самостојна работа.
Сепак, примерот на Синг не значи дека секој што ќе започне со монтажа на видеа ќе заработува илјадници евра месечно.
Неговата приказна покажува колку се менува пазарот на трудот: денес, за некои професии, поважни од канцеларијата и дипломата можат да бидат практичните вештини, креативноста и способноста да се привлече вниманието на милиони луѓе.