Италија планира да воведе построги правила за возачите кои се движат со премала брзина на автопатиштата, особено кога го користат крајниот лев сообраќаен појас.
Според информациите објавени од италијанскиот правен портал „Брокарди“ и швајцарскиот „Блу њуз“, новите ограничувања првично би се применувале на автопатишта со најмалку три ленти во секоја насока.
На левата лента најмалку 100 километри на час
Со предложените измени се предвидува возачите што се движат по крајната лева лента на овие автопатишта да одржуваат брзина од најмалку 100 километри на час.
Оние што без оправдана причина ќе возат побавно од предвиденото би можеле да добијат парична казна од 40 до 160 евра.
Сепак, правилото нема да важи во сите ситуации. Исклучоци се предвидени кога временските услови или состојбата на патот не дозволуваат безбедно движење со таква брзина.
Така, возачите ќе можат да возат побавно при густа магла, силен дожд, сообраќајни незгоди, работи на патот или големи застои. Исклучок ќе има и на делниците каде што сообраќајната сигнализација пропишува поинакво ограничување.
Новите правила сè уште не се во сила
Предложените казни се дел од нацрт-законот за безбедност во сообраќајот, кој италијанската влада го одобри во октомври и го достави до парламентот.
Тоа значи дека мерката засега е предлог и сè уште не се применува, а конечните одредби ќе бидат познати по завршувањето на законодавната постапка.
Промените ќе бидат важни и за туристите
Новите правила би можеле да бидат значајни и за странските возачи, бидејќи Италија е една од најпосетуваните европски земји, а голем дел од туристите пристигнуваат со автомобил.
Според податоците на Италијанскиот институт за заштита на животната средина и истражување (ISPRA), пред две години околу 40,7 милиони странски посетители влегле во земјата со автомобил, што претставува речиси 46 проценти од вкупните меѓународни пристигнувања.
Доколку предложените измени бидат усвоени, возачите на одредени италијански автопатишта ќе треба да внимаваат не само да не ја надминат максималната дозволена брзина, туку и да не возат премногу бавно во лентите за побрзо движење.