На релацијата Тетово–Скопје, билетот во еден правец кој претходно чинеше 200 денари сега изнесува 250 денари, додека за повратен билет се потребни 500 денари.
Уште поголем трошок е месечната карта. Нејзината цена е зголемена од 5.500 на 6.500 денари, што претставува поскапување од 1.000 денари, односно околу 18%.
Поскапо патување и од Куманово
Повисоки цени има и за патниците на релацијата Куманово–Скопје.
Еднонасочниот билет е зголемен од 170 на 200 денари, а повратниот сега чини 400 денари. Месечната карта, пак, наместо досегашните 5.000 денари, сега изнесува 6.000 денари.
Според досега објавените информации, новите цени следуваат по зголемувањето на цените на нафтените деривати. Приватните автобуски превозници не објавиле подетално официјално образложение за формирањето на новите цени.
Од Министерството за економија и труд е посочено дека во услови на пазарна економија цените се формираат слободно и дека во моментов нема законска основа со која тие би биле ограничени.
11.000 денари ако секој ден се купува повратен билет
За студентите кои пет дена во неделата патуваат до факултет, превозот веќе претставува сериозна ставка во семејниот буџет.
Доколку студент од Тетово купува повратен билет од 500 денари секој работен ден, за 22 дена патување месечниот трошок би достигнал околу 11.000 денари.
Месечната карта од 6.500 денари е значително поисплатлива опција, но и таа претставува висок фиксен трошок, особено кога ќе се додадат храната, факултетските обврски и останатите секојдневни издатоци.
Билетот е поскап и од дел од студентските стипендии
Колку е голем трошокот најдобро покажува споредбата со износот на државните студентски стипендии.
Во конкурсот на Министерството за образование и наука за студиската 2025/2026 година, за одредени категории студенти е предвидена стипендија од 6.050 денари месечно, која се исплаќа девет месеци во годината.
Тоа значи дека само месечниот автобуски билет Тетово–Скопје, кој чини 6.500 денари, е за 450 денари поскап од цел месечен износ на таква стипендија.
Сепак, важно е да се нагласи дека износот од 6.050 денари не се однесува на сите студентски стипендии, туку на определени категории.
Студентите реагираат на новите цени
Од „Студентарија МК“ информираат дека преку платформата „Дигитален студентски глас“ добиле пријави од студенти кои се соочуваат со високите трошоци за превоз.
Оттаму реагираат на новите цени на билетите на релациите од Тетово и Куманово кон Скопје, кои за студентите што мора секојдневно да патуваат претставуваат трошок што не може да се избегне.
За овие студенти превозот повеќе не е повремен расход, туку фиксна месечна ставка која во одредени случаи е повисока и од износот на државната студентска стипендија.