Во анализата се споредени 15 популарни паметни телефони според специфичната стапка на апсорпција (SAR), која ја мери количината радиофреквенциска енергија што ја апсорбира ткивото во стандардизирани лабораториски услови.
На врвот се „Ајфон 17“ со 1,50 W/kg и „Ајфон 16е“ со 1,49 W/kg. По нив следуваат „Самсунг Галакси З Фолд7“ со 1,40 W/kg и „Галакси С26“ со 1,21 W/kg.
Најниска измерена вредност меѓу анализираните уреди има „Самсунг Галакси А16 5Г“, со 0,38 W/kg.
Вредностите се разликуваат и според местото на мерење
Резултатите не се исти кога телефонот се тестира во близина на главата и на телото. На пример, „Моторола Разр 60“ има вредност од 0,84 W/kg за главата, но 1,39 W/kg за телото. Кај „Гугл Пиксел 9“, вредностите се 0,99 W/kg за главата и 1,40 W/kg за телото.
На измерените резултати влијаат дизајнот на антената, фреквенциите и условите на тестирање. Затоа, вредностите не можат да се генерализираат за цели брендови.
Дали повисокото зрачење значи и поголема опасност?
Не нужно. Повисоката САР-вредност не значи автоматски и поголем здравствен ризик. Станува збор за максимални вредности добиени во лабораториски услови, кои не ја покажуваат реалната изложеност во секојдневната употреба.
Количината на зрачење зависи и од јачината на мобилниот сигнал, условите на мрежата и оддалеченоста на телефонот од главата. Користењето звучник или слушалки може да ја намали изложеноста.
Радиофреквенциските бранови од мобилните телефони се нејонизирачко зрачење. Според американската Агенција за храна и лекови (FDA), досегашните научни докази не укажуваат на поврзаност меѓу изложеноста на ова зрачење и здравствени проблеми.
Листата, сепак, служи за споредба на лабораториските мерења, а не како доказ дека одреден модел е опасен за секојдневна употреба.