Во 2025 година, Франција ја задржа позицијата на најпосетувана земја во светот, поставувајќи и нов национален рекорд. Земјата ја посетиле 102 милиони меѓународни туристи, кои оствариле вкупно 743 милиони ноќевања, според податоците на француското Министерство за економија. Најголем дел, односно 76 отсто од странските посетители, пристигнале од други европски земји.
Шпанија, сепак, не заостанува многу. Во 2025 година таа регистрирала 96,8 милиони странски туристи, што е раст од 3,2 отсто во споредба со 2024 година, кога земјата ја посетиле 94 милиони луѓе.
Предвидувања: Шпанија на првото место до 2040 година
Заедничката анализа на Делоит и Гугл го следи развојот на глобалниот туристички сектор од 1990 година и нуди проекции за неговиот развој до 2040 година.
Според истражувањето, бројот на туристички патувања во светот ќе продолжи да расте и до 2040 година би можел да достигне 2,4 милијарди. Најголем дел од тие патувања се очекува да бидат насочени кон европските земји, кои би привлекле околу 38 отсто од вкупниот број.
Во периодот од 2019 до 2040 година, Европа би можела да добие повеќе од 362 милиони дополнителни туристи. Токму Шпанија се предвидува да биде на врвот на листата, со околу 110 милиони туристи годишно, додека Франција би имала приближно 105 милиони посетители.
САД и Кина се очекува да останат меѓу петте најпосетувани земји во светот. Во меѓувреме, Италија би можела да падне на шестата позиција, а Мексико да се искачи на петтото место. Меѓу 15-те најпосетувани земји до тогаш би можеле да се најдат и Саудиска Арабија, Индонезија и Обединетите Арапски Емирати.
Азиско-пацифичкиот регион, познат како АПАК, се очекува да биде втор по растот на бројот на странски туристи. Проекциите покажуваат дека во периодот од 2019 до 2040 година регионот би можел да привлече повеќе од 278 милиони дополнителни посетители.
Рекордни приходи, но и сè поголем притисок од туристите
Поголемиот број туристи носи значајни приходи за Шпанија. Минатата година приходите од странските посетители пораснале за 6,8 отсто и достигнале 134,7 милијарди евра, во споредба со 126 милијарди евра во 2024 година, според податоците на Министерството за туризам.
Но, растот на туризмот има и своја друга страна. Голем број шпански туристички дестинации веќе се справуваат со проблемите што ги носи прекумерниот број посетители.
Во последните неколку години, низ различни делови на земјата се организираа масовни протести, на кои граѓаните бараа од властите конкретни решенија за последиците од прекумерниот туризам.
Какви мерки веќе се преземаат?
Шпанската влада во септември минатата година најави дека околу 53.000 туристички станови ќе бидат отстранети од Единствениот регистар на туристички и сезонски изнајмувања. Планот е овие недвижности во иднина да се пренаменат за трајно, долгорочно изнајмување.
Барселона, пак, најави постепено укинување на краткорочното туристичко изнајмување до 2028 година, со што илјадници станови би требало повторно да станат достапни за долгорочни закупци.
Градот уште во 2023 година го ограничи и бројот на дневни пристигнувања на крузери во централното пристаниште – од 10 на седум.
Иако прогнозите покажуваат дека Шпанија би можела да стане светски лидер по бројот на туристи, останува прашањето дали земјата ќе успее да го одржи тој раст без дополнително да го продлабочи веќе постоечкиот проблем со прекумерниот туризам.