Системот „Сејф сити“ (Safe City) ќе добие дополнителен начин за откривање и регистрирање на сообраќајните прекршоци, преку употреба на мобилни камери, најави Министерството за внатрешни работи.
Новината предвидува поставување камери во специјално опремени полициски возила, кои ќе овозможат контрола на сообраќајот и на места каде што досега немаше поставено фиксни камери.
Со ова, надзорот нема да биде ограничен само на однапред познатите локации на кои се поставени стационарните уреди, туку ќе може да се спроведува и на други делници и сообраќајници.
Системот „Сејф сити“ автоматски ги регистрира прекршоците како што се возење со брзина над дозволената, минување на црвено светло и управување со нерегистрирано возило. Воведувањето мобилни камери треба да овозможи поширок опфат на контролата и поефикасно откривање на прекршителите.
Основната цел на ваквиот начин на надзор е подобрување на сообраќајната дисциплина, намалување на прекршоците и зголемување на безбедноста на сите учесници во сообраќајот.